11 stycznia 2015
Pogodzich my połra razy Wichtora chciejli łodwiydzić, ale my miejli kazdy dziyń gości. I całe scejściy, bo chto by tejla ciaciuchow pozjołdoł?!
– Przeca musimy Wichtora łodwiydzić – padołch Hejdli na dwa dni przed zilwestry. – Łoni na pewno na nołs cekajo. Idziymy tera?
– Do mitaku je dość casu. Wejźniymy jy napka galertu, co?
– Toć, bo Wichtora sie go sami nie zrobio – padołach kobiycie i drapko my sie łoblykli.
Na prostki dośli my do Wichtory blank wartko. Klupia do dwiyrzi – cicho. Klupia jescyk rołz – nic.
– Sie dzie pośli… – pejdziała Hejdla. – Pojda do łokna w łogrodku.
Ale nie musiała, bo Wichtora sie odezwali.
– Poćcie rajn, joł sa je!
Właziymy do kuchnie i łoco nie wierza: na stole połno pacuskow, miynskow, krałskow, bojtlikow… To samo na bifeju i na łoknie. My śtałnowali.
– Nale Wichtora, co to robicie?! – spytołch joł, bo Hejdla zaglondała na to jak woł we malowane wrota.
– Na co, na choroby sie rychtuja. Jak mie lykarze nie chco lycyć, musa sie sama lycyć – padali sąsiadka.
– To wyście so chorzi? – spytała Hejdla.
– Dzie ta, ale sie na choroby rychtuja, bo chto je dzisiej zdrowy, jutro moze być chory. I ty mi bandzies musiała pomoc. Bo do kogos pojda?
– Joł wołs wierza nie rozumia – moja kobiyta aze sie na hokrze siadła. – Wy wiycie, ize becie chorzi?
– Nie wia, dziołcha, ale moze sie tak zdarzić, a lykarze wszystko pozawierali i wykońconoł sprawa.
– A co joł bana miała do tego? Przeca joł lykarzy nie je – Hejdla sie aze z nerwow wziona tasiyntuchy wycierać.
– Suchejcie mie. Joł sie bana lykować tak, jak sie moji starka lykowali: ziely! Zajrzi, Hejdlo. Sa mo we dwióch miynskach bagno, to je na biegunka; to je pokrzywa – na wszystko; tu mo majoranek – jak co ciynskygo zjys; tu je lyn – na puca; zalwia – na bole w gambie – ale co ci bana gołdać. A nie jejdzies dziesiej do haptyki?
– Pojada. Co wo kupić?
– Dziejsiyńć flaskow Klołsterfrałmelizyngajstow, tych strzejdnich, piyńć Amolłow, śtyry Dopylherce… Co tak na mie zaglondołs?!
– Nadyć to be kostowała jaky trzista, śtyrysta złoty, mołcie tejla piniyndzy? – Hejdla juz była fertich.
– Toć mo, na to śporuja. Jak mie lekarz nie wpuści, to się bana sama lykować – Wichtora praskli piyńścio we stoł i zajrzejli na mie.
– Mołcie prawie, nie becie na śmierć cekać – padołach somsiadce.
– Ja, synek, a jak mie Ponbocek bano chciejli powołać, to mi ani lekarze nie pomogo.
Tejla my sie dowiejdziejli u Wichtory przed zilwestry.
Jak zejście so gyśpan, jako to Hejdla Wichtorzi nakupiła, to wo powia na drugyrołz.
Was Paul
Od redakcji "Beczki": Pan Paul przez wiele lat pisał listy do papierowej "Beczki". Mamy nadzieję, że będzie je systematycznie pisywał także do "Beczki" elektronicznej na portalu "Grupa Lokalna". Będziemy się starać, by nowe listy pana Paula ukazywały się raz w miesiącu, na przemian z listami dawniejszymi, które będziemy tu przenosić z papierowej "Beczki". Archiwalne listy będziemy na wstępie oznaczać, podając z którego wydania "Beczki" pochodzą.
