W niejdziela popołejdniu zawse groł polskoł Serie A, czyli A klasa. Tym razym powalcyć ło punkty z TOR-ym II na dobrzyńskoł fussballarena przijechała Jełowoł, co sie zwie Śtart. Słuńce fest grzoło w dekel, ale to nic nie zawołdzało, bo Achim zawsze namocy trołwa przed szpily tak, coby num sie lepiej grało i zeby rzicko nie było pozdziyrane jak chtory wźlizg zrobi.
Fot. Marek Romanowski tordobrzen.com
Syndzia jak zawse wykludził łoba manśafty na szpilplac. Jus na samy pocuntku my sie dziwili i anungu nie miejli, skund tejla kibiców przisło?! Dyć to boł mecz jak kazdy a tu ołs setka. Albo ni, jus wiam. W tabeli to nas sumsiołd, pogoda dobroł a z Jełowej tes do Dobrznia nie je daleko. Skoda, ze my piwska nie mieljli w beckach, to by my ich wszystkich ugościli.
Piyrsy gwizdek i Jełowoł siedła sie na chłopców z TOR-u. To znacy, ze zdobyli boisko i przeważali. Pewno bes to, ze gospodołrze grali za nisko w ataku. Brunili się, ale sami tes miejli okazje. Yno zawse cegoś brakło! Rołs jedyn synek z Dobrznia przejył bala, Kunrad wrzescoł mu z trybun „gneeej z tym koksym” no i tak tes zrobioł. Yno, ze jak jus strzejlił na bramka to nie trefił. Jełowoł tes. Jak jus byli pod nasu bramku, to jak jedyn się machnył, to bala trefił tak (a raczej prziciuloł), ze łun polejcioł hoch wysoko, a prandzej noga by do bramki wlejciała. I to tak. Jak idzie o szusy na bramka łod łobu manszaftów to było ciołpranie.
A syndzia? To jus w piyrsej czynści się potracił. Auty pokazywoł w drugoł struna, faulu nie gwizdnył to na niego jus rycejli z trybun: „syndzia kaj ty mołs brejle?!”. Jak łun sie pomejlił i źle gwizdnył zawodnikowi, to na szpilplacu było jescyk wiynske larmo. Jerucha dyć to prawie haja była! Jedyn synek dostoł kartka, bo mu nerwy puściły, ale to i tak moze się ciesyć, ze yno zołtoł.
W drugiej połowie szpil sie wyrównoł. Goście lepiej grali balym, warciej i wiyncej miejli podań. My zaś wiyncej lołtali po ich połowie i wiyncej szusali do ich bramki. Ja… wiam, raczej kole niej, a nie do. Widać było po zmarasunych zachach, albo śportanzugach jak kto woli, ze kibice oglundali zaciynty szpil.
Rołs num sie poscynściło! Chop z Jełowej łobalił sie w nasym polu karnym. Niy ma w tym w sumie rewalacji… no ja, jedyn z nasych mu przi tym pumóg. Dobrze, ze syndzia taki ciaprołk. Dziynki tymu nie było karnego, a łun sie nasuchoł.
Łuni durch mieli eki. Musiejli my sie drurch wrołcać pod nasa bramka. Na scynście geferlich było yno rołs. Przi tym szusie z głowy po ece ratowoł nołs bramkołrz. Na cały szpil to dwa razy ratowoł num zadki. Za piyrsy razy to ołs nie było mejglich, ze synek z Jełowej trefił prosto w nasego bramkołrza. Kunrad pewno jus herzszlaku dostołwoł.
Do ostatniego gwizdka były nerwy. Szpil sie skuńcył i każdy dostoł po jedny punkcie. Nastympny nas mecz jus w cwortek.
